open

በአዲስ አበባ 200 ሺህ ዜጎችን በስራ ዕድል ፈጠራና በምግብ ዋስትና መርሃ ግብር ተጠቃሚ ለማድረግ ዝግጅቱ ተጠናቋል

  Tuiste/ሚዲያ/ዜና/ማህበረሰብ/በአዲስ አበባ 200 ሺህ ዜጎችን በስራ ዕድል ፈጠራና በምግብ ዋስትና መርሃ ግብር ተጠቃሚ ለማድረግ ዝግጅቱ ተጠናቋል

በአዲስ አበባ 200 ሺህ ዜጎችን በስራ ዕድል ፈጠራና በምግብ ዋስትና መርሃ ግብር ተጠቃሚ ለማድረግ ዝግጅቱ ተጠናቋል

 

(አዲስ አበባ፣ ከንቲባ ጽ/ቤት) የአዲስ አበባ ከተማ አስተዳደር እስከ መጭው ግንቦት ወር ድረስ ከድህነት ወለል በታች የሚገኙ 200 ሺህ የመዲናዋ ዜጎችን በስራ ዕድል ፈጠራና በምግብ ዋስትና ተጠቃሚ ለማድረግ እየሰራ መሆኑን ሚያዚያ 3 ቀን 2010 ዓ.ም  አስታውቋል።

 

የአዲስ አበባ ከተማ ከንቲባ ድሪባ ኩማን ጨምሮ ሌሎች የከተማ አስተዳደሩ የስራ ኃላፊዎች፣ በሦስት ክፍለ-ከተሞች ማለትም በጉለሌ ወረዳ 7 ፣ በየካ ወረዳ 12  እና በአራዳ ክፍለ-ከተማ ወረዳ 1 በመሬት ተፋሰስ ልማትና በከተማ ግብርና ዘርፎች ዙሪያ የስራ እድል ተጠቃሚዎች እያከናወኗቸው የሚገኙ ተግባራትን ጎብኝተዋል።

 

ለአብነትም በጉለሌ ክፍለ ከተማ ከ14 ሺህ በላይ ዜጎች በመርሃ ግብሩ ተጠቃሚ ሲሆኑ፣ 2 ሺህ 399 የሚሆኑት በምግብ ዋስትና መርሃ ግብር የቀጥታ ተጠቃሚዎች እንደሆኑ ተጠቁሟል።12 ሺህ የሚሆኑት ደግሞ በተለያዩ አምስት ዘርፎች ተጠቃሚዎች ናቸው፡፡

 

በተመሳሳይም በየካ ክፍለ-ከተማ ጫካ ሚካዔል ተብሎ በሚጠራው ቦታ 21 ሄክታር መሬት ላይ 729 የሚሆኑ በተፋሰስ ልማት ላይ የተሰማሩ የመርሃ ግብሩ ተጠቃሚዎች የስራ ክንውን ተጎብኝቷል። በአራዳም ልዩ ቦታው እሪ በከንቱ በሚባለው ቦታ በ0.12 ሄክታር ላይ 112 ወንዶችና 377 ሴቶች በድምሩ 489 የህብረተሰብ ክፍሎች በጓሮ አትክልት ልማት ላይ ተሳትፈው ገቢ በማግኘት ላይ እንደሚገኙ በጉብኝቱ ተመልክቷል፡፡

 

የመርሃ ግብሩ ተጠቃሚዎች በተፈጠረላቸው የስራ እድል ደስተኞች መሆናቸውን ቢገልጹም፤ በስራቸው የሚያገኙት ክፍያ አነስተኛ መሆኑንና ከሚያገኟት አነስተኛ ብር ላይ ቁጠባ ቆጥበው የተደላደለ ኑሮ ለመኖር የሚያስችላቸው ባለመሆኑ የተሰማቸውን ቅሬታ ገልጸዋል።

 

ከንቲባውም የክፍያውን አነስተኛነት ግንዛቤ ውስጥ በመክተት፤ በቀጣይ በ15 በመቶ ለማሳደግ ከአለም ባንክ እና ከሚመለከታቸው የፌደራል መንግስት አካላት ጋር እየተነጋገሩበት እንደሆነ አስረድተዋል፡፡

 

የጉብኝቱ አላማም ከድህነት ወለል በታች ያሉ የፕሮግራሙ ተጠቃሚዎች ያሉበትን ሁኔታ ለማየትና በተጠቃሚዎችየተከናወኑ ያሉ የአካባቢ ልማት ስራዎችን ለመጎብኘት መሆኑን ክቡር ከንቲባ ድሪባ ኩማ ገልጸዋል፡፡

 

በሀገር አቀፍ ደረጃ በስራ ዕድል ፈጠራና በምግብ ዋስትና መርሃ-ግብር ከመንግስትና ከዓለም ባንክ በጥቅሉ 450 ሚሊየን ዶላር ተመድቧል፡፡ ይህ መርሃ-ግብር ይፋ ከሆነበት ከ2009 ግንቦት ወር ጀምሮ እስካሁን 123 ሺህ ዜጎች ተጠቃሚ መሆናቸው ተገልጿል። እስከ መጭው ግንቦት ወር ድረስም ከ32 ሺህ በላይ ቀጥተኛ ድጋፍ የሚያገኙ ዜጎችን ጨምሮ በጥቅሉ 200 ሺህ ዜጎች የመርሃ ግብሩ ተጠቃሚ ይሆናሉ ተብሏል፡፡

 

Read 271 times