open

«ወጣቱ በበጎ ፈቃድ አገልግሎቱ አዲስ አበባን እንደስሟ ማደስይችላል »

  Tuiste/ሚዲያ/ዜና/አስተዳደር/«ወጣቱ በበጎ ፈቃድ አገልግሎቱ አዲስ አበባን እንደስሟ ማደስይችላል »

«ወጣቱ በበጎ ፈቃድ አገልግሎቱ አዲስ አበባን እንደስሟ ማደስይችላል »

 

(አዲስ አበባ፣ ከንቲባ ጽ/ቤት) የአዲስ አበባ ወጣቶችና ስፖርት ቢሮ የክረምት በጐ ቃደኛ ወጣቶችን ሰብስቦ ነሐሴ 4 ቀን 2010 ዓ.ም. በከተማ አስተዳደሩ ምክር ቤት መሰብሰቢያ አዳራሽ አወያይቷል፡፡

በመድረኩ የመክፈቻ ንግግር ያደረጉት ምክትል ከንቲባ ወ/ሮ ዳግማዊት ሞገስ እንዳሉት፣ ወጣቱ በበጐ ፈቃድ አገልግሎቱ እያበረከተ ያለው አስተዋፅኦ የማይተካ እና ጉልህ እንደሆነ ገልፀዋል፡፡ ወጣቱ በሀይማኖታዊ በዓላት የሚያደርገውን አካባቢን የማፅዳት፣ አቅመ ደካሞችን የመርዳት ባህሉን በበዓላት ወቅት ብቻ አከናውኖ ማቆም ሳይሆን ዓመቱን ሙሉ በማስቀጠል፣ ከተማችንን ከአካባቢ እስከ ወረዳ ከወረዳ እስከ ክፍለ ከተማ ብሎም ከተማዋን ሙሉ በሙሉ በማዳረስ አሁን የተጀመረውን ለውጥ ማስቀጠል ይገባዋል ብለዋል፡፡ምክትል ከንቲባዋ አክለውም በየአካባቢው የሚገኙ ታዋቂ ሰዎችን፣ አርቲስቶችን፣ ባለ ሀብቶችንና ተፅዕኖ ፈጣሪ ሰዎችን በማስተባበር የተለያዩ የቁሳቁስ እርዳታዎች ያደርጉ ዘንድ እንዲያስተባበሩ መልዕክታቸውን አስተላልፈዋል፡፡

 

 

በዕለቱ የሀይማኖት ተቋማት በዓል አድማቂዎች፣ የእግር ኳስ ክለብ ደጋፊ ማህበራት ሰብሳቢዎች፣ ማህበረ ቅዱሳን እና ሌሎች አካላት የተገኙ ሲሆን በዘመነ አዲስ ቤትን ማደስ፣ በቤተ አዲስ ፍቅርን፣ መተባበርን፣ ይቅርታን፣ አንድነትን መንገስ በሚል መሪ ቃል በአቶ ዮናስ አረጋይ የአዲስ አበባ ወጣቶችና ስፖርት ቢሮ ምክትል የቢሮ ኃላፊ የመነሻ ዕቅድ ሰነድ ቀርቧል፡፡ ዕቅዱም በዋናነት በአንድ ወረዳ አንድ ቤት፣ በአዲስ አመት ውብ መንደር፣ በአዲስ ዘመን ስጦታ ለሀገሬ፣ የጐዳና ላይ ትርኢት፣ የአዲስ ዓመት ዋዜማ ፌስቲቫል፣ ሰብአዊ አገልግሎት ደም መለገስ የሚሉ አበይት ተግባራት የተካተቱበትን ሰነድ አቅርበዋል፡፡ ተሳታፊዎቹም በቀረበዉ ሰነድ ላይ ተጨማሪ ሀሳብ  በማከል ለመስራት ዝግጁነታቸዉን ገልፀዋል፡፡

አዲስ አበባ የኢትዮጵያ ዋና ከተማ፣ የአፍሪካ ህብረት መቀመጫ፣ የዓለም ዲኘሎማቶች መናኸሪያ እንደመሆኗ መጠን የበለጠ መሥራት እንደሚጠይቅና ለክልል ከተሞችና ለአፍሪካም አርአያና ሞዴል መሆን እንደሚጠበቅባት መድረኩን የመሩት የአዲስ አበባ ከተማ ወጣቶችና ስፖርት ቢሮ ኃላፊ አቶ ንጋቱ ዳኛቸው አስረድተዋል፡፡

 

በመጨረሻም በአንድ ወረዳ ሶስት ወጣቶች በመምረጥ በ117ቱም ወረዳዎች የማደራጀትና የማስተባበር ሥራውን መሬት ለማውረድ  ወጣቶቹ ኃላፊነታቸውን ተረክበው ውይይቱ ተጠናቋል፡፡

 

Read 307 times