open

የተጀመረው ጥልቅ የተሐድሶ ጉዞ ተጠናክሮ ሊቀጥል እንደሚገባ ተገለፀ፡፡

  Tuiste/ሚዲያ/ዜና/ማህበረሰብ/የተጀመረው ጥልቅ የተሐድሶ ጉዞ ተጠናክሮ ሊቀጥል እንደሚገባ ተገለፀ፡፡

የተጀመረው ጥልቅ የተሐድሶ ጉዞ ተጠናክሮ ሊቀጥል እንደሚገባ ተገለፀ፡፡

(አዲስ አበባ፣ ከንቲባ ጽ/ቤት)የአዲስ አበባ ከተማ አስተዳደር ከንቲባ ጽ/ቤትና የአዲስ- ዙ ፓርክ አመራሮችና ሠራተኞች 26ኛውን ዓመት የግንቦት 20 የድል በዓል ግንቦት 19 ቀን 2009 ዓ.ም በከተማ አስተዳደሩ የምክር ቤት አዳራሽ በጋራ አክብረዋል፡፡

በመድረኩ ላይ ‹‹የኢትዮጵያ ፌዴራላዊ ስርዓት ባህሪያት፣ የዴሞክራሲያዊ አንድነት ግንባታ ሒደትና ስኬቶቹ ›› በሚል ርዕስ ሰነድ ቀርቦ፤ በበዓሉ ተሳታፊዎች ውይይት ተካሂዶበታል፡፡

በንጉሡም ሆነ በደርግ ሥርዓት ወቅት የነበሩት ሕገ-መንግስቶች፣ የኢትዮጵያን ሕዝቦች ሰብዓዊና ዴሞክራሲያዊ መብቶች ያረጋገጡ ባለመሆናቸው፤ የአገሪቱ የቁርጥ ቀን ልጆች ባደረጉት መራር ተጋድሎ፣ የኢትዮጵያን ብሔር፣ ብሔረሰቦችና ሕዝቦች እኩልነትና በመፈቃቀድ ላይ የተመሰረተ ዴሞክራሲያዊ አንድነትን ያረጋገጠ፤ ፌደራላዊ ስርዓት ሊፈጠር መቻሉ ተመልክቷል፡፡

በውይይቱ ወቅትም ከግንቦት 20 የድል ማግስት አንስቶ፤ መዲናችን አዲስ አበባን ጨምሮ በመላ አገሪቱ የተመዘገቡ የእድገት እምርታዎች መንገድ፣ ጤና፣ ትምህርትና ሌሎችም ወሳኝ የልማትና የእድገት ምህዋሮችን አስመልክቶ የደረሱበት ደረጃ ካለፈው ጋር በንጽጽር ቀርቧል፡፡

በዚህ ወቅት የበዓሉ ተሳታፊዎች እንደተናገሩት፣ ‹‹የዘንድሮውን የግንቦት 20 የድል በዓል ስናከብር፣ የተጀመረውን የጥልቅ ተሃድሶ ጉዞ በማጠናከር፤ በከተማዋ በአገልግሎት አሰጣጡ ሒደትና በሌሎቹም የሚስተዋሉ የኪራይ ሰብሳቢነት አመለካከቶችና ብልሹ አሰራሮችን፣ በሕዝባዊ የዓላማ ጽናት ታግሎ ለማረምና ለማስተካል ከመቼውም ይልቅ ዝግጁነታችንን በማረጋገጥ ሊሆን ይገባል›› ሲሉ አስተያየቶቻቸውን ሰጥተዋል፡፡

ተሳታፊዎቹ አክለውም፣ አገሪቱ ቀደም ሲል ብዝሐነት የማይስተናገድባት፤ ማንነቶችና ቋንቋዎች የተዘነጉባት፤ እንደነበረችና ይህም እስከ ደርግ ስርዓት ውድቀት ድረስ የዘለቀ ጉዳይ መሆኑን፣ የጭቆናው ቀንበርም በከባድ መስዋዕትነት ተወግዶ፤ የዜጎች ዴሞክራሲያዊ አንድነት የቃል ኪዳን ሰነድ የሆነው ሕገ-መንግስት ከፀደቀ በኋላ እኩልነት፣ ልማትና ዘላቂ እድገት የተመዘገቡበት እንደሆነ ለዚህም የግንቦት 20 የድል በዓል መሰረት መሆኑን መረዳታቸውን ገልፀዋል፡፡

Read 331 times Last modified on Donderdag, 08 Junie 2017 07:35