open

የሴክተር መስሪያ ቤት ሠራተኞች ከኤች አይ ቪ ተጽዕኖ ነጻ የሆነ ህብረተሰብ መፍጠር እንደሚጠበቅባቸው ተጠቆመ

  Tuiste/ሚዲያ/ዜና/ልዮ ልዮ/የሴክተር መስሪያ ቤት ሠራተኞች ከኤች አይ ቪ ተጽዕኖ ነጻ የሆነ ህብረተሰብ መፍጠር እንደሚጠበቅባቸው ተጠቆመ

የሴክተር መስሪያ ቤት ሠራተኞች ከኤች አይ ቪ ተጽዕኖ ነጻ የሆነ ህብረተሰብ መፍጠር እንደሚጠበቅባቸው ተጠቆመ

(አዲስ አበባ፣ ከንቲባ ጽ/ቤት)  በከተማ አስተዳደሩ የከንቲባ ጽ/ቤት ሠራተኞች የስትራተጂክ ዕቅድ ዝግጅት፣ ክትትል፣ ግምገማና ሪፖርት ዝግጅት ዳይሬክቶሬት፣ ከሥርዓተ-ፆታ የሥራ ክፍል ጋራ በጋራ ያዘጋጁት የኤች አይቪ ኤድስ የግንዛቤ ማስጨበጫ ስልጠና፣ ግንቦት 28 ቀን 2009 ዓ.ም  በከተማ አስተዳደሩ አይሲቲ አዳራሽ ተካሒዷል፡፡

በዚህ ወቅት ከአዲስ አበባ ኤች አይቪ ኤድስ መከላከያና መቆጣጠር ጽ/ቤት በአሰልጣኝነት የተገኙት አቶ መስፍን ሺበሺ እንደጠቆሙት፤  የሴክተር መስሪያ ቤት ሠራተኞች  ከኤች አይ ቪ ተጽዕኖ ነጻ የሆነ ህብረተሰብ በመፍጠር በጉዳዩ ላይ የሚጠበቅባቸውን አስተዋጽዖ መወጣት ያለባቸው መሆኑን ጠቁመዋል፡፡

የኤች አይ ቪ ኤድስ አመራር መቀዛቀዝ፣ የግብኣት ስርጭት ችግር መኖር፣ የሪፈራል ትስስሮሽ ችግር፣ ተጋላጮችን ኢላማ ያደረገ የምርመራ አገልግሎት አለመኖር፣ የፀረ-ኤች አይ ቪ መድሃኒት በተገቢው መልኩ ተደራሽ አለመሆንና የመሳሰሉት በሽታውን በመቆጣጠሩ ሒደት ዋንኛ ተግዳሮቶች መሆናቸውን አቶ መስፍን አስረድተዋል፡፡

እስካሁን የተገኙ ስኬቶችም በሽታውን ለማቆም ለሚደረገው ጥረት መደላድል እንጂ በስኬትነት ሊቆጠሩ እንደማይገባና ኢትዮጵያም እንደ ግብ በ2030 ኤች አይ ቪ ኤድስን የማስቆም እቅድ መያዝዋን ጨምረው ገልጸዋል፡፡

በስልጠናው የተሳተፉ የጽ/ቤቱ ሠራተኞችም ኤች አይ ቪ ኤድስን አስመልክቶ የሚሰጠው ትምህርት፣ ከዚህ ቀደም ሲሰጥ በነበረበት የትኩረት ልክ እየቀጠለ አለመሆኑን ጠቅሰው፤ አመራሩም ከፍተኛ ትኩረት በመስጠት፤ለግንዛቤ መፍጠርና መከላከሉ ሥራ ማስኬጃ የሚያዘውን በጀት በታለመለት ሥራ ላይ መዋሉን መከታተል የሚጠበቅበት መሆኑን ተናግረዋል፡፡

ኢትዮጵያ በኤች አይቪ ኤድስ የሚሞቱ ሰዎችን ቁጥር በመቀነስ ረገድ በዓለም አቀፍ ደረጃ የመጀመሪያው ረድፍ ላይ ከሚቀመጡ አገራት ተርታ መቀመጧን ተከትሎ፤ ይደረጉ የነበሩ ዓለም አቀፍ ድጋፎች መቀነሳቸውንና በህብረተሰብም ሆነ በአገር ደረጃ፣ በራስ አቅም የበሽታውን ስርጭት መከላከል የሚቻልበት ስልት ተነድፎ፤ በመሰራት ላይ እንደሆነ በውይይቱ ወቅት ተጠቁሟል፡፡

የከንቲባ ጽ/ቤት አመራሮችና ሠራተኞች ከወርሃዊ ደመወዛቸው ከዜሮ ነጥብ አምስት ከመቶ እስከ አንድ ነጥብ ተቆራጭ በማድረግ አስር ወላጅ አልባ ህጻናትን በእንክብካቤ በማሳደግ ላይ መሆናቸው የሚታወስ ነው፡፡

Read 509 times Last modified on Donderdag, 08 Junie 2017 08:46