open

የአዲስ አበባ ትምህርት ቢሮ የ7መቶ ሺህ ዩሮ የእርዳታ ስምምነት ተፈራረመ

  Tuiste/ሚዲያ/ዜና/ልዮ ልዮ/የአዲስ አበባ ትምህርት ቢሮ የ7መቶ ሺህ ዩሮ የእርዳታ ስምምነት ተፈራረመ

የአዲስ አበባ ትምህርት ቢሮ የ7መቶ ሺህ ዩሮ የእርዳታ ስምምነት ተፈራረመ

(አዲስ አበባ፣ ከንቲባ ጽ/ቤት) የአዲስ አበባ ከተማ አስተዳደር ትምህርት ቢሮ ከጣሊያንና ከፈረንሳይ የዕድገት ማህበር ኤጀንሲ ጋር ለንፁህ ውሃ አቅርቦትና  ለፅዳት የሚውል የ7መቶ ሺህ ዩሮ (18 ሚሊዮን ብር) ገደማ ስምምነት ሐምሌ 14 ቀን 2009 ዓ.ም በከንቲባ ጽ/ቤት የካቢኔ መሰብሰቢያ አዳራሽ ተፈራርሟል፡፡

በስምምነቱ ወቅት የመክፈቻ ንግግር ያደረጉት የአዲስ አበባ ትምህርት ቢሮ  ምክትል ኀላፊ አቶ ኀይለስላሴ ፍስሃ፣ የጣሊያንና የፈረንሳይ የእድገት ማህበር ኤጀንሲ እርዳታ፣ በአዲስ አበባ መካኒሳ እና ላፍቶ አካባቢ በተመረጡ አራት የአንደኛ ደረጃ ትምህርት ቤቶች፣ ለተማሪዎች ንፁህ ውሃ በማቅረብ  ንፅህናቸዉን ለመጠበቅ እንደሚያስችላቸዉ ተናግረዋል፡፡

 

ከአሁን በፊት ተፈጥሮ የነበረውን የአተትና ሌሎች በትላትል ሳቢያ የሚመጡ ተላላፊ በሽታዎችን ጭምር ለመከላከል እንደሚያስችል የተናገሩት ምክትል የቢሮ ኀላፊዉ፣ በቀጣይ 2010 የትምህርት ዘመን ሙሉ በሙሉ ወደ ስራው እንደሚገቡ ገልፀዋል፡፡ ከዋሽ ፕሮግራም ጋር የሚሰራው  ሥራ በየትምህርት ቤቱ መፀዳጃ ቤት የሚሰራባቸው ዝቅተኛ  ገቢ ያላቸው የተማሪ ቤተሰቦችን ማዕከል አድርጎ፤ ትምህርት ቤቶቹ እንደተመረጡ በማስገንዘብ፤ ይህንን እርዳታ ላደረጉት የጣሊያንና ፈረንሳይ ተወካዮች ምስጋናቸዉ ከፍተኛ እንደሆነ ምክትል የቢሮ ኀላፊዉ ጨምረዉ ተናግረዋል፡፡

በፈረንሳይ ኤምባሲ የባህል ማዕከል ካውንስለር ሚስተር ፖስካል ሩዝ  በበኩላቸው፣ ተደረገው እርዳታ ተማሪዎች ትምህርታቸውን በሙሉ ጤንነትና ንፁህ አካባቢ እንዲማሩ ምቹ ሁኔታን ለመፍጠር መሆኑን በመግለፅ፤ በዚህም ደስታቸው  ወደር  እንደሌለው እና በቀጣይም  ለማገዝ ከትምህርት ቢሮዉ ጎን የሚቆ መሆናቸዉን አስገንዝበዋል፡፡

የጣሊያን የዕድገት ማህበር ኤጀንሲ ኀላፊ ሚስ ጀኔቭራ ሊቲዚያ  በበኩላቸው ፣ ይህንን ሀሳብ  ላቀረቡላቸው  የፈረንሳይ  አቻቸውና  በፕሮግራሙ ለተገኙ በሙሉ ምስጋናቸው ላቅ ያለ መሆኑን ገልፀው፤ በዚህ በአዲስ አበባ  ትምህርት ቤቶች ላይ በሚደረገው የንፁህ ውሃ አቅርቦትና ተላላፊ በሽታን  የመከላከል  ሥራ ላይ መሳተፋቸው በጣም እንዳኮራቸው ተናግረዋል፡፡ የስምምነት ሰነዱ ላይም ሦስቱ ተወካኞች ፊርማቸውን በማስቀመጥ የሰነድ ልውውጥ አድርገዋል ፡፡

በተያያዘም የዋሽ አማካሪ ሚስተር ቶማስ ታማኒኒ በተለይ ለፕሬስና ህዝብ ግንኙነት ዴስክ እንደገለፁት፣ የንፁህ ውሃ አቅርቦትና የመፀዳጃ ቤት ግንባታው  በአዲስ አበባ ብቻ እንደማይወሰንና በአራት ክልሎች ማለትም በኦሮሚያ፣ በአማራ፣ በደቡብና በትግራይ በድምሩ ሃያ ሦስት በሚሆኑ ከተሞች ላይ ለመስራት እቅድ መያዛቸዉን ተናግረዋል፡፡

 

Read 995 times Last modified on Maandag, 31 Julie 2017 09:05