“የከተማችን የፍሳሽ ማስተላለፊያ መስመሮች የውሃ መውረጃ እንጂ የቆሻሻ መጣያ አይደሉም!” በሚል 2ኛው የፍሳሽ መውረጃ ቱቦዎች እና መስመሮች የፅዳት ዘመቻ ንቅናቄ በተለያዩ ክፍለ ከተሞች ተካሂዷል ።
ምክትል ከንቲባ ወ/ሮ አዳነች አቤቤ ከከተማ ልማት እና ኮንስትራክሽን ሚንስትር ኢ/ር አይሻ መሀመድ ጋር በመሆን በንፋስ ስልክ ላፍቶ ክፍለ ከተማ ላፍቶ አካባቢ በሚገኝ የጋራ መኖሪያ ቤቶች ችግኝ በመትከል እና የፍሳሽ ማስተላለፊያ ቱቦዎችን አጽድተዋል።
ቆሻሻ የሚጥሉ እጆች ሳይሆን ቆሻሻ የሚያነሱ እጆች ይበረታታሉ ያሉት ምክትል ከንቲባ ወ/ሮ አዳነች አቤቤ ነዋሪዎች ቆሻሻን ባለመጣል ለከተማዋ ውበት እና ጽዳት የበኩላቸውን ሚና መወጣት አለባቸው ብለዋል።
በባለፉት ወራት የጽዳት ዘመቻ መርሐግብሮች ከ6ሺህ ኪሎሜትር በላይ የውሃ መውረጃ ቱቦዎች የጸዱ መሆናቸውን የገለፁት ወ/ሮ አዳነች አቤቤ በዚህም ከ3ሚሊዮን በላይ ነዋሪዎች ተሳታፊዎች መሆናቸውን ተናግረዋል ።
የከተማ ልማት እና ኮንስትራክሽን ሚንስትር ኢ/ር አይሻ መሀመድ በበኩላቸው የአዲስ አበባ ከተማ አስተዳደር ነዋሪዎችን በማስተባበር አካባቢን በማጽዳት እያደረገ ያለው እንቅስቃሴ ለሌሎች ከተሞችም አርዓያ የሚሆን በመሆኑ ሊበረታታ ይገባል ብለዋል።
በዛሬው ዕለትም የከተማ አስተዳደሩ ከፍተኛ የስራ ኃላፊዎች፣በጎ ፈቃደኛ ወጣቶች፣ የጸጥታ አካላት፣የጽዳት ሰራተኞች እና ልዩ ልዩ የህብረተሰብ ክፍሎች የተሳተፉበት የጽዳት ዘመቻ መርሐግብር በተለያዩ ክፍለከተሞች ተካሂዷል ።