በእንጨት ሳጥን የጦር መሳሪያ ደብቆ ሲያዘዋውር የተገኘ ግለሰብ እጅ ከፍንጅ መያዙን የአዲስ አበባ ፖሊስ ገለፀ። የጦር መሳሪያ ዝውውርን ለመከላከል በሚደረጉ ጥረቶች የህብረተሰቡ ሚና ከፍተኛ መሆኑ ተገልጿል።

ተጠርጣሪው የግል ጥቅሙን ብቻ በማስቀደም በህገ-ወጥ መንገድ በማይጠረጠር ሁኔታ ለዚሁ ህገ ወጥ ተግባር ማስፈፀሚያ ባዘጋጀው ከእንጨት በተሰራ ሳጥን ውስጥ በጨርቅ ጠቅልሎ 1ምንሽር ፣ 1 አብራራው ጠመንጃ እና 1 ቱርክ ሰራሽ ኢኮልፒ ሽጉጥ ጭኖ ወደ ጎጃም ሊሄድ ሲል በመናኸሪያው ውስጥ በጫኝና አውራጅ በተደረጁ አጋዥ ኃይሎች እጅ ከፍንጅ መያዙን የአዲስ አበባ ፖሊስ አስታውቋል። ግለሰቡ የጦር መሳሪያዎቹን ከደቡብ ኢትዮጵያ ይዞ ማምጣቱነት ለፖሊስ ከሰጠው ቃል መረዳት ተችሏል፡፡

ህገወጥ የጦር መሳሪያ ዝውውርን ለመቆጣጠር እየተሰሩ ባሉ ስራዎች የህብረተሰቡ ተሳትፎ ወሳኝ ስለሆነ ይሄው ተጠናክሮ ሊቀጥል እንደሚገባ የአዲስ አበባ ፖሊስ መልዕክቱን አስተላልፏል፡፡