የክረምቱ ዝናብ ከመጠናከሩ ጋር ተያይዞ በአዲስ ከተማ ወረዳ 3 ልዩ ቦታው አማኑኤል ሆስፒታል አካባቢ የደረሰው ጉዳት ተጨማሪ ጥፋት እንዳያስከትል የእሳትና አደጋ ስጋት ስራ አመራር ኮሚሽንና የአዱስ አበባ መንገዶች ባለስልጣን የጀመሩትን ህይወት አድን ርብርብ አጠናክረው እንዲቀጥሉ ማሳሰቢያ ተሰጠ።

በዛሬው እለት ጉዳቱ የደረሰበትን ቦታ በአካል ተገኝተው የጎበኙትና ጉዳት የደረሰባቸውን ነዋሪዎች ያፅናኑት በምክትል ከንቲባ ማእረግ የአዲስ አበባ ከተማ ዋና ስራ አስኪያጅ አቶ ጥራቱ በየነ ዝናቡ ተጠናክሮ መቀጠሉን ግምት ውስጥ በማስገባት ጎርፉ ቀጣይ ጉዳት እንዳያስከትል የተጀመሩ የመፍትሄ እርምጃዎች በአፋጣኝ ተግባራዊ እንዲደርጉ አሳስበዋል።

የአዲስ አበባ እሳትና አደጋ ስጋት ስራ አመራር ኮሚሽን ኮሚሽነር ሰለሞን ፍስሃ በበኩላቸው በትናንትናው እለት በስምንት ቤቶች የሚኖሩ 30 ቤተሰቦች ላይ ጉዳት በማድረስ ለሁለት ሰዎች ህልፈተ ህይወት ምክንያት የሆነው የጎርፍ አደጋ በድንገተኛ የጣለው ከአቅም በላይ የሆነ ዝናብ የፍሳሽ ቦዮችን በመዝጋቱ የተከሰተ እንደሆነ ገልፀዋል፤ ቦታው ቀደም ሲል በስጋትነት ከተለዩት አካባቢዎች ውስጥ የተካተተ እንዳልነበረም ጠቁመዋል።

የአዲስ አቡባ መንገዶች ባለስልጣን የተደፈኑ የፍሳሽ ቱቦዎች ጠረጋ ስራ ሰማከናወን በተጨማሪ የማሺነሪ አቅርቦትን በመጨመር አፋጣኝ ጉዳቱን የመቀነሰ ተግባር እያከናወነ እንደሚገኝ የባለስልጣኑ ዋና ዳይሬክተር ኢንጅነር ሞገስ ጥበቡ ተናግረዋል ።

በአዲስ አበባ በአሁኑ ወቅት ክረምቱ እየያለ በመምጣቱ የሚመለከታቸው ባለድርሻ አካላት ተገቢውን የመከላከል ተግባር እንዲያከናውኑ ህብረተሰቡም አስፈላጊውን ጥንቃቄ እንዲያደርግ በዚሁ ወቅት ጥሪ ቀርቧል።